BORD STIÚRTHA IMRAM

FIONNUALA NÍ DHÚGÁIN

Is abhcóide í Fionnuala Ní Dhúgáin a chleachtann an dlí sibhialta le speisialtóireacht sa dlí tráchtála agus sa dlí talún. Bhain sí amach céim sa dlí ó Choláiste na Tríonóide agus Ard-Dioplóma i gCumarsáid Fheidhmeach ó OE Gaillimh roimh staidéir in Óstaí an Rí. Glaodhadh chun an bharra in Éirinn í sa bhliain 2005 agus chun an bharra i Sasana agus sa Bhreatain Bheag i 2013. Dáta tosaithe: 24 Bealtaine 2021.

BREANDÁN Ó CAOLLAÍ

(Cathaoirleach)

Bleá Cliathach é Breandán ón gCabrach Thiar. Ní raibh aon Ghaeilge sa mbaile aige agus ba a mhúinteoir bunscoile, Dessie Ryan, a  spreag a ghrá don teanga a mhéadaigh as cuimse tar éis scoláireachtaí a bhronn an ITGWU air le dul siar go Coláistí Chois Fharraige.  Ghnóthaigh sé BA agus A.T.O.(UCD), Dioplóma in Oideachas Aosach (Maigh Nuad), MA sa Riarachán Poiblí (IPA) is MA sa Ghaeilge Fheidhmeach (DIT). Chaith sé tréimhsí ag obair le Ógras, Bord na Gaeilge is an Roinn Oideachais. Chaith sé 34 bliain san Roinn Gnóthaí Eachtracha, 20  bliain thar lear in Ambasáidí is Ard-Chonsalachtaí: Londain, An Bhruiséil, An Róimh, Nua Eabhrac, Boston is Canberra na hAstráile.

Thar lear, bhain sé úsáid as an teanga i gcónaí le cur le tuiscint a lucht éisteachta ar shaibhreas teangacha na hÉireann agus le comhbhá le teangacha bundúchasacha a léiriú. Ghlac sé gach deis cultúr agus litríocht Gaeilge a chur chun cinn agus a fhorbairt i measc diaspora na hÉireann agus pobal dúchasach na tíre ina raibh sé.

CORMAC DE BARRA

Is ceoltóir proifisiúnta agus léiritheoir/láithreoir teilifíse é Cormac a rugadh is a tógadh i mBaile Átha Cliath. Fuair sé oiliúint sa cheol óna sheanmháthair, an cruitire agus amhránaí, Róisín Ní Shé.

Mar chruitire, tá Cormac tar éis taisteal is taifeadadh le cuid de mhór-cheoltóirí na hÉireann, Moya Brennan, Brian Kennedy, Máire Breatnach, The Chieftains, Julie Feeney, Anne-Marie O’Farrell agus Clannad ina measc. 

Chomh maith lena chuid ceoil, tá Cormac ag obair sna meáin in Éirinn le tríocha bliain anois ar chláracha do TG4, RTÉ agus Sky Arts.

Chuir sé an tsraith ealaíne ‘Imeall’ i láthair ar feadh trí bliana ar TG4 agus bhí sé ina  chomhairleoir scripte ar an scannán TARRAC le haghaidh Cine4.

Tá sé i mbun Dochtúireachta in Ollscoil Luimnigh faoi láthair ar athbheochan na cruite sa 20ú aois.

LIAM Ó MAOLAODHA

Bleá Cliathach ó thús é ach tá sé ag cur faoi i gConamara le scaitheamh de bhlianta. Bhí sé ar feadh beagnach fiche bliain i gceannas ar Choláiste na bhFiann nó gur ceapadh é mar Stiúrthóir ar Oireachtas na Gaeilge i 1996 agusis ann a chríochnaigh sé a shaol oibre i 2021. Bhí plé go leor aige le féilte Cheilteacha eile, An Mód, Eisteddfod, Féile Interceltique Lorient agus le bunú Oireachtas Gaeilge Cheanada. Rinne sé ionadaíocht don Oireachtas ar an iliomad Coistí a bhí ag plé le cur chun cinn na Gaeilge agus na healaíon traidisiúnta teangabhunaithe ach go háirithe. Feictear go minic anois é ar chúrsaí Ghailf ar fud cúige Chonnachta. Dáta tosaithe: 31 Bealtaine 2022.

CORMAC Ó DÚLACHÁIN

Is Abhcóide Sinsearach é Cormac ó 2002 agus tá sé ina Chathaoirleach ar Cumann Barra na Gaeilge. Tá céim MA bainte amach aige le deireanas i Scríobh & Cumarsáid na Gaeilge. Tá ceangal tharr na blianta aige le mórán eagraíocht Gaeilge agus Gaeltachta agus bhí sé gníomhach ar coistí gaelscoileanna. Tá suim faoi leith aige sa drámaíocht. Tá sé gníomhach leis na Gasóga Mara. Dáta tosaithe: 31 Bealtaine 2022.

MICHAEL DOHERTY

Michael Doherty

Tá an Chathaoir Staidéir Chliniciúil ar Ainmhithe Feirme i Scoil an Leighis Tréidliachta UCD ag an Ollamh Michael Doherty.  Iar-Uachtarán an Choláiste Eorpach ar shláinte buaibheach, fuair sé aitheantas mar shaineolaí Eorpach ar shláinte na gcaorach chomh maith.

Bhain sé a chéim tréidliachta amach in Ollscoil Dhún Éideann agus sular thosaigh sé a ghairm acadúil in UCD, d’oibrigh sé i gcleachtadh ginearálta tréidliachta ar an Inis Eoghain agus i gcleachtadh i Lannraig Albain a bhí ceangailte le hOllscoil Glaschú.

Fear Dhoire-Inis Eoghain é a bhí ina Déan i Scoil an Leighis Tréidliachta UCD ó 2016-2023. Bhí Michael mar chathaoirleach ar Bhord na Gaeilge UCD (Gaeltacht UCD) mar atá faoi láthair, ar feadh 20 bliana ó 2003 go 2023

Tá spéis faoi leith aige sa bhéaloideas de réir mar a bhaineann sé le h-ainmhithe feirme agus faoi láthair, tá sé i mbun taighde ar sheanchas na caorach le comhghleacaí i Scoil na Gaeilge, an Léinn Cheiltigh agus Bhéaloidis.

ALAN TITLEY

Úrscéalta, gearrscéalta, fabhalscéalta, filíocht, drámaí stáitse agus raidió, scripteanna teilifíse, aistriúcháin, colúin, aistí agus scoláireacht scríte aige. Duaiseanna liteartha bainte aige san Oireachtas, fara Duais Pater don drámaíocht ón Astráil, Stewart Parker Award ón BBC, duais Eilís Dillon don scríbhneoireacht do dhaoine óga agus gradam ón Irish-American Cultural Institute.

Léiríodh drámaí leis in Amharclann na Mainistreach, Amharclann na Péacóige agus Amharclann Samuel Beckett agus aistríodh ceann díobh, Tagann Godot, go hIodáilis, Fraincis, agus Rúisis a léiríodh in Cív na hÚcráine. Chuir cláir litríochta i láthair ar RTÉ agus scríobh sé agus chuir sé i láthair Scéal na Gaeilge do TG4. D’aistrigh sé Cré na Cille an Chadhnaigh go Béarla faoin teideal The Dirty Dust, fara saothair eile dá chuid.

 Chaith sé cúig mbliana fichead ina Cheann ar Roinn na Gaeilge i gColáiste Phádraig, Droim Conrach (NUI agus DCU) sular ceapadh ina Ollamh le Nua-Ghaeilge é in UCC a bhfuil sé ina ollamh emeritus ann anois. Seal caite, leis, aige ina ollamh cuarda in Ollscoil Uladh. Suim aige i ngach gné de litríocht na Gaeilge, agus cur amach aige chomh maith ar éigse Ghaidhlig na hAlban.

Corcaíoch ó dhúchas ó shráideanna na cathrach. Dáta tosaithe: 24 Bealtaine 2021.

GRÁINNE NÍ GHILÍN

Feirsteach í Gráinne Ní Ghilín a bhfuil céim bainte amach aici sa Ghaeilge agus sa Cheol ó Choláiste na hOllscoile, Corcaigh, mar aon le Teastas Iarchéime san Oideachas ó Choláiste Ollscoile Naomh Mhuire, Béal Feirste agus Máisteacht i Léann an Aistriúcháin ó Ollscoil na Banríona. Chaith sí dhá bhliain mar eagarthóir ar An tUltach mar aon le bliain amháin i mbun múinteoireachta i mBunscoil Bheann Mhadagáin. Is aistritheoir Gaeilge creidiúnaithe í agus tá sealanna caite aici ag obair mar léachtóir Gaeilge in Ollscoil na Banríona agus in Ollscoil Uladh. Bhí sí mar Léiritheoir ar an ábhar Gaeilge sa churaclam digiteach a rinne an BBC agus d’oibrigh sí in Europus ar an Cheathrú Rua mar fhotheidealóir agus aistritheoir. Is gníomhaí í ar son cearta teanga agus is ball gníomhach í den Dream Dearg. Is í Stiúrthóir Feidhmiúcháin Chultúrlann McAdam Ó Fiaich, ionad ealaíon bisiúil Gaeilge atá suite i gcroílár Cheathrú Gaeltachta Bhéal Feirste.  

MÁIRE NÍ ANNRACHÁIN

Ollamh Sinsearach emerita le Nua-Ghaeilge i UCD í Máire Ní Annracháin. Sular ceapadh í i UCD chaith sí blianta fada in Ollscoil Mhá Nuad. Litríocht na Gaeilge an t-ábhar spéise agus taighde ba mhó a bhí aici i gcónaí. Leag sí béim ar bhisiúlacht na nualitríochta agus ar na fréamhacha traidisiúnta atá aici. Bhí agus tá i gcónaí spéis mhór aici freisin sna ceangail idir an Ghaeilge abhus agus an Ghàidhlig in Albain. Ba chabhair léi saothar teoirice na Fraincise agus an Bhéarla; d’fhéach sí i gcónaí len iad a chur in oiriúint don Ghaeilge.Tá tréimhsí taighde caite aici i bPáras, i nDún Éideann, ar an Oileán Scitheanach agus i Londain. Is iomaí sin saothar acadúil atá foilsithe aici. Mhúin sí cúrsai ar raidhse gnéithe de theanga agus litríocht na Gaeilge.

Tá moltóireacht déanta aici in an-chuid comórtas de chuid Oireachtas na Gaeilge i gcaitheamh na mblianta, go háirithe sna comórtais fhilíochta agus úrscéalaíochta.

Chaith sí roinnt blianta ina cathaoirleach ar Glór na nGael agus ar bhord stiúrtha Sabhal Mòr Ostaig in Albain. Ceapadh í ina ball d’Acadamh Ríoga na hÉireann i 2022, áit a bhfuil sí ina cathaoirleach ar Coiste Léann na Gaeilge agus na gCultúr Ceilteach agus ina ball de Chomhairle an Acadaimh. Is ollamh cúnta í in Ollscoi Mhá Nuad.

STIÚRTHÓIR

LIAM CARSON

Is stiúrthóir na féile litríochta Gaeilge IMRAM é Liam Carson. Is scríbhneoir agus léirmheastóir é chomh maith, is foilsíodh a chéad leabhar, Call Mother a Lonely Field, sa bhliain 2010. Scríobhann sé go rialta d’iris Éigse Éireann/Poetry Ireland Review, is foilsíodh aistí agus dánta leis sna hirisí New Hibernia Review, Seashores, Presence, Irish Review, Comhar agus An Guth.

BAINISTEOIR

MAJELLA NÍ CHRÍOCHÁIN

Tá os cionn 35 bliain caite ag Majella ag obair sna réimsí ealaíon, cumarsáide, cultúir, oideachais, forbairt phobail agus forbairt tuaithe.  Tá iliomad imeachtaí cultúir agus ealaíon reáchtáilte aici thar na blianta, féilte ealaíon, féilte leabhar agus tréimhsí cónaitheacha ina measc. Tá saothar úr ealaíon coimisiúnaithe aici ó scríbhneoirí, ó cheoltóirí, ó fhísealaíontóirí, ó dhrámadóirí agus ó chóiréagrafaithe. Nuair nach bhfuil sí ag plé leis na healaíona, is breá léi a bheith ag rith, ag rothaíocht agus ag snámh.