CLÁR FÍORBHRAON

Is máistir ar an liric ghearr é Louis de Paor, dar leis an gcriticeoir Máirín Nic Eoin, a chruthaíonn nasc teann d’íomhánna a chuireann daoine, eachtraí nó caidrimh in iúl. Grá Fiar/Crooked Love an cnuasach is déanaí uaidh. Is rinceoir comhaimseartha, cóiréagrafaí, drámadóir agus file í Róisín Sheehy. Sa chéad chnuasach uaithi, Líomóidi ’s Rúbarb, fiosraítear an ealaín, an stair, an tírdhreach, an béaloideas agus an pholaitíocht go liriceach snasta. Cumann Máire Dinny Wren dánta agus gearrfhicsean a scaoileann carachtair shuimiúla chugainn. Tine Ghealáin an cnuasach is déanaí uaithi. Tá an t-amhránaí Conallach Emma Ní Fhíoruisce faoi thionchar an cheoil thraidisiúnta agus sól. Cuireann sí a lucht éisteachta faoi dhraíocht le hamhráin thraidisiúnta agus aistriúcháin ar amhráin aitheanta.

Is file dátheangach í Eibhlís Carcione. Scríobhann sí don aos óg chomh maith. Sa chnuasach is déanaí uaithi, Bean Róin, faightear dánta croí-oscailte a chuimsíonn ábhar pearsanta agus ábhar polaitiúil: bás tuismitheora, abair, tírdhreach sceirdiuil Chernobyl, nó an cogadh san Úcráin.  File agus gearrscéalaí í Róise Ní Bhaoill a tharraingíonn as traidisiúin scéalaíochta Rann na Feirste i nDún na nGall. Sa bhailiúchán gearrscéalta Imram agus scéalta eile, tugtar ar aistear samhlaíochta sinn tríd an stair, an tírdhreach agus anam an duine. Bhuaigh Fionntán de Brún Gradam Úrscéalaíochta an Oireachtais 2022 lena chéad úrscéal Béal na Péiste, ina ríomhtar scéal corraitheach a bhaineann leis an gcuimhne, le dílseacht, ceart is mícheart agus a thugann an léitheoir leis ar aistear ón nGearmáin aimsir na Naitsíoch go Béal Feirste sna 1980í. Amhránaí iomráiteach agus cláirseoir as Conamara í Síle Denvir. Ainmníodh mar Amhránaí na Bliana í ar Ghradam Ceoil TG4. Eisíodh albam léi i mbliana Anamnesis, amhráin ar an sean-nós i gcomhar leis an léiritheoir John Reynolds agus an dordveidleadóir Caroline Dale.

Is file, gearrscéalaí agus drámadóir í Biddy Jenkinson agus duine de na scríbhneoirí is mó le rá in Éirinn, i gceachtar den dá phríomhtheanga againn. Is iad na cnuasaigh is déanaí óna peann cumasach ná Sceilg na Scál agus Táinrith. File, amhránaí, cumadóir amhrán agus craoltóir é Marcus Mac Conghail. Cuimsíonn a scríbhneoireacht spraíúil foirmeacha éagsúla, an liric ghearr, an dán coincréiteach, an caoineadh agus an liodán. Dhá chnuasach leis is ea Ceol Baile agus Spásas. Guth nua corraitheach i saol na héigse in Éirinn í Laoighseach Ní Choistealbha a chuimsíonn téamaí a bhaineann leis an dúlra, an timpeallacht agus an grá. Ag obair ar a céad chnuasach atá sí faoi láthair. Is file é Mícheál Ó hAodha. Cíorann na dánta íogair agus suaithinseach sna leabhair Slán le hÉirinn agus Leabhar na nAistear mothúcháin na nGael a chuaigh ar imirce go Sasana san am atá thart. 

Is máistir ar an liric ghearr é Louis de Paor, dar leis an gcriticeoir Máirín Nic Eoin, a chruthaíonn nasc teann d’íomhánna a chuireann daoine, eachtraí nó caidrimh in iúl. Grá Fiar/Crooked Love an cnuasach is déanaí uaidh. Is rinceoir comhaimseartha, cóiréagrafaí, drámadóir agus file í Róisín Sheehy. Sa chéad chnuasach uaithi, Líomóidi ’s Rúbarb, fiosraítear an ealaín, an stair, an tírdhreach, an béaloideas agus an pholaitíocht go liriceach snasta. Cumann Máire Dinny Wren dánta agus gearrfhicsean a scaoileann carachtair shuimiúla chugainn. Tine Ghealáin an cnuasach is déanaí uaithi. Tá an t-amhránaí Conallach Emma Ní Fhíoruisce faoi thionchar an cheoil thraidisiúnta agus sól. Cuireann sí a lucht éisteachta faoi dhraíocht le hamhráin thraidisiúnta agus aistriúcháin ar amhráin aitheanta.